A cidade de A Coruña avanza para obter o recoñecemento como Destino Turístico Intelixente
O Concello da Coruña iniciou esta semana os traballos para avanzar cara ao recoñecemento como Destino Turístico Intelixente, un modelo impulsado a nivel estatal para mellorar a xestión dos destinos a través da innovación, a tecnoloxía, a sostibilidade, a accesibilidade e a gobernanza.
O proceso desenvolverase co apoio de Segitur, a Sociedad Estatal para la Gestión de la Innovación y las Tecnologías Turísticas, dependente da Secretaría de Estado de Turismo. Esta actuación forma parte da elaboración do 'Plan Estratéxico de Turismo' da cidade, financiado a través do Plan de Sostenibilidad Turística do Ministerio de Industria e Turismo.
A primeira fase consistirá nunha diagnose da situación actual da Coruña como destino turístico. Para iso analizaranse 97 requisitos e 261 indicadores, que permitirán avaliar o grao de cumprimento da cidade nos diferentes ámbitos que conforman o modelo DTI. A partir dese estudo, o Concello recibirá unha serie de recomendacións para mellorar a planificación turística e reforzar a competitividade do sector.
O concelleiro de Cultura e Turismo, Gonzalo Castro, destacou que A Coruña conta con boas conexións, infraestruturas, unha rede hoteleira e gastronómica de primeiro nivel, así como cun patrimonio e unha historia que forman parte da identidade local. O edil sinalou tamén que a cidade reúne condicións para aspirar a este distintivo ao tratarse dun destino innovador, sostible e accesible.
Segundo o Goberno municipal, a obtención deste recoñecemento permitiría mellorar a experiencia das persoas visitantes, reforzar a posición da Coruña no mercado turístico, crear novas sinerxías entre administracións e empresas e impulsar unha cultura máis innovadora na xestión do destino.
O modelo tamén busca favorecer un turismo máis ordenado, capaz de xerar retorno económico e social para a cidade sen perder de vista a calidade de vida da veciñanza. Nese sentido, o Concello considera que avanzar cara ao selo de Destino Turístico Intelixente encaixa coa estratexia de planificación turística que se está a desenvolver.
Para obter a condición de Destino Turístico Intelixente é necesario acadar un grao de cumprimento igual ou superior ao 80% dos requisitos establecidos na metodoloxía. A nivel estatal xa contan con este recoñecemento ou forman parte da rede destinos como Barcelona, Bilbao, Benidorm, Donostia/San Sebastián, Gijón, Málaga, Santander, Valencia ou Vitoria.