A Casa Niño Barbarito abre a preinscrición para solicitar praza en Vilarmaior
A próxima apertura da Casa Niño Barbarito permitirá ampliar os recursos de conciliación familiar no concello de Vilarmaior. As familias interesadas en conseguir unha praza para os seus fillos e fillas xa poden realizar a preinscrición mediante o formulario habilitado para este proceso.
A solicitude debe enviarse por correo electrónico ao enderezo cnbarbarito@gmail.com, que tamén servirá como canle de contacto para as persoas que precisen máis información sobre o servizo.
O centro estará situado en Armada número 16, baixo, na parroquia de Vilarmaior. A Casa Niño ofrecerá atención integral e personalizada a nenos e nenas de entre tres meses e tres anos, nun grupo reducido de ata cinco participantes.
O servizo contempla a atención das necesidades básicas da infancia, incluíndo alimentación, hixiene e descanso, e desenvolverase de xeito flexible, con garantías de seguridade e calidade. Ademais, terá carácter gratuíto para as familias usuarias.
Este modelo de atención busca facilitar a conciliación da vida laboral e familiar, especialmente nos municipios rurais, onde a dispoñibilidade de recursos para a primeira infancia pode ser máis limitada. A iniciativa tamén pretende favorecer a igualdade de oportunidades no acceso aos servizos, independentemente do lugar de residencia.