Infraestructuras

Os informes municipais avalan a súa incorporación ao patrimonio público e a adxudicación podería alcanzar un prezo de arredor de 20.000 euros

A Casa Gótica está máis preto de volver ser de titularidade pública despois de case dúas décadas en ruínas. O Concello de Betanzos deu un novo paso no procedemento iniciado para facerse con este emblemático inmoble do século XV, desmantelado en 2007 e pendente desde entón dunha solución que permita recuperar o edificio.

A alcaldesa, María Barral, anunciou que os servizos técnicos municipais xa emitiron os informes preceptivos favorables para avalar o interese público de incorporar a propiedade ao patrimonio municipal. A documentación foi remitida á Deputación da Coruña, que tramita o procedemento a través do seu Servizo de Recadación.

A vía aberta pretende facer efectivo o cobro das débedas que a propiedade mantén coa Administración, tanto polas multas impostas como polos gastos asumidos polo Concello para garantir a seguridade do inmoble, dos peóns e dos edificios lindeiros.

Ante a falta de pagamento voluntario, a Deputación solicitou ao Concello que determinase se tiña interese en adquirir o inmoble. A resposta municipal foi afirmativa, polo que agora deberá continuar a tramitación necesaria para que a Casa Gótica poida ser adxudicada ao Concello.

Se o procedemento culmina, o inmoble pasará a mans públicas e abrirase a porta a unha nova etapa centrada na súa rehabilitación. A alcaldesa considera este avance un fito para a cidade despois de anos de intentos para atopar unha solución ao estado de abandono do edificio.

Durante este tempo puxéronse en marcha diferentes vías para esixir á propiedade a reconstrución da Casa Gótica, entre elas actuacións xudiciais e expedientes urbanísticos. Tamén se chegou a formular unha execución subsidiaria das obras, que saíu a licitación en 2021, aínda que o concurso quedou deserto.

Agora o Concello poderá formular directamente o futuro do inmoble. Entre as opcións que se están estudando figuran a instalación de servizos municipais, a creación de espazos vinculados ao Camiño de Santiago ou mesmo a construción de vivendas de uso público.

O destino definitivo aínda non está decidido e dependerá, entre outros factores, do financiamento que se poida conseguir para acometer a rehabilitación.

En canto ao custo da operación, a normativa establece que a adxudicación non pode superar o 75 % do valor de taxación. A Casa Gótica está actualmente valorada en 27.881 euros, polo que o importe da adxudicación ascendería a 20.910,75 euros.

Esta cantidade non suporía un desembolso directo para as arcas municipais, xa que se descontaría da débeda que a propiedade mantén co Concello. Actualmente, esa cantidade ascende a 37.863,88 euros entre multas e outros conceptos.

A parte restante da débeda continuará sendo reclamada a través da Deputación. Mentres, o procedemento avanza co obxectivo de que un dos edificios máis representativos do casco histórico poida volver formar parte do patrimonio público e, tras case vinte anos de abandono, afrontar finalmente a súa recuperación.