A Casa das Ciencias mergúllase na eclipse solar cun documental inmersivo ata finais de agosto
A Casa das Ciencias da Coruña reforza a súa programación divulgativa de cara á eclipse solar do próximo 12 de agosto coa proxección diaria do documental inmersivo '3CLIPSE', unha produción creada para achegar ao público un dos acontecementos astronómicos máis destacados das próximas décadas.
O documental proxéctase no planetario en dúas sesións diarias, ás 13.00 horas en castelán e ás 19.00 horas en galego, cunha capacidade total de case 160 prazas ao día. A programación estará dispoñible ata o 31 de agosto, aínda que os días 25 de xullo e 29 de agosto non se ofrecerá a sesión en castelán.
'3CLIPSE' estreouse o pasado 26 de xuño de maneira simultánea en 35 planetarios, museos e centros científicos de España e Portugal. A produción céntrase nas tres eclipses solares que poderán observarse desde a Península Ibérica nos anos 2026, 2027 e 2028, combinando divulgación científica, narrativa visual e tecnoloxía inmersiva para explicar tanto o fenómeno astronómico como a súa importancia histórica e cultural.
A historia está protagonizada por unha nena e a súa avoa, que acompañan ao público nun percorrido para descubrir como se producen as eclipses, que significado tiveron para diferentes civilizacións ao longo da historia e por que continúan espertando tanta fascinación na actualidade.
O proxecto está coordinado polo Museo Elder de la Ciencia y la Tecnología de Las Palmas de Gran Canaria e coproducido polo Concello da Coruña a través dos Museos Científicos, coa colaboración da Fundación Española para la Ciencia y la Tecnología (FECYT). Ademais, conta coa participación do estudo de animación coruñés Antaruxa e dos técnicos dos Museos Científicos Bibiana García Visos, na produción, e Marcos Pérez Maldonado, responsable do guión.
O concelleiro de Cultura e Turismo, Gonzalo Castro, destacou que A Coruña será un dos lugares privilexiados para contemplar a eclipse total e sinalou que o Goberno municipal quixo aproveitar esta oportunidade para impulsar actividades educativas e divulgativas que permitan á cidadanía comprender mellor este fenómeno.
Ademais das proxeccións no planetario, a iniciativa ofrece na súa páxina web diversos recursos gratuítos, como unha exposición descargable, unha guía didáctica, vídeos divulgativos e outros materiais educativos dirixidos tanto ao público xeral como aos centros escolares.
Esta programación forma parte dos preparativos do Concello para a xornada do 12 de agosto, na que se espera unha importante afluencia de visitantes coincidindo coa eclipse solar e coa celebración do Trofeo Teresa Herrera. O dispositivo municipal incluirá un reforzo da seguridade, do transporte urbano e a habilitación de aparcadoiros disuasorios, ademais dun visor interactivo que permitirá localizar os mellores puntos da cidade desde os que seguir o fenómeno.