Xabier Díaz e Adufeiras de Salitre e Xosé Lois Romero e Aliboria protagonizarán o cartel musical da Feira 1900 de Curtis
A música tradicional será a gran protagonista da X Feira 1900 de Curtis, que se celebrará os días 25 e 26 de xullo cun programa centrado na recuperación da cultura popular galega. O Concello confirmou a participación de dúas das formacións máis recoñecidas do panorama actual: Xabier Díaz & Adufeiras de Salitre, que actuarán o sábado 25, e Xosé Lois Romero e Aliboria, que subirán ao escenario o domingo 26.
Esta edición da feira está dedicada á música e ao baile tradicional, polo que ambos concertos converteranse nun dos principais reclamos dun evento que cada verán transforma o municipio nunha recreación das antigas feiras que xurdiron arredor da estación de ferrocarril de Curtis, inaugurada en 1883 e decisiva para o desenvolvemento económico e social da vila.
Xabier Díaz & Adufeiras de Salitre chegarán a Curtis avalados por unha ampla traxectoria internacional, con centos de actuacións por escenarios de todo o mundo e varios recoñecementos á súa contribución á música de raíz galega. Pola súa banda, Xosé Lois Romero e Aliboria ofrecerán unha proposta que fusiona voces femininas, percusión tradicional e sonoridades ancestrais, consolidándose nos últimos anos como un dos proxectos máis innovadores do folk contemporáneo.
Os concertos completan unha programación que tamén incluirá o pregón a cargo do director da Axencia Turismo de Galicia, Xosé Manuel Merelles, un novo espazo gastronómico con showcookings do cociñeiro André Arzúa, teatro familiar, mercado tradicional, artesanía, exposicións e numerosas actividades para recrear o ambiente das históricas feiras de comezos do século XX.