Vista Alegre reúne esta tarde a 36 atletas na terceira xornada do Circuíto Galego de Lanzamentos Longos
A Cidade Deportiva de Vista Alegre convértese esta tarde nun dos focos do atletismo galego coa celebración da terceira xornada do II Circuíto Galego de Lanzamentos Longos. A competición desenvolverase desde as 17.00 horas nas pistas ordenses, onde están convocados 36 deportistas dispostos a buscar as súas mellores marcas en martelo, disco e xavelina.
A cita reunirá especialistas en varias categorías de lanzamento, como as de disco en 800 gramos, 1 quilo, 1,5 quilos e 1,750 quilos, ademais de martelo en 3, 4, 5 e 6 quilos e xavelina en 500 e 700 gramos.
Entre os clubs participantes figuran Atletismo Ordes, como equipo anfitrión, Atlética A Silva, Club Atletismo Sada, Sanysec Club Ourense Atletismo, Sociedade Ximnástica Pontevedra, C.D. La Purísima, Lucus Caixa Rural Galega, C.A. Santiago, Club Atletismo Narón, Atletismo Samertolameu e Viguesa de Atletismo.
A celebración desta xornada reforza ademais o papel de Ordes como escenario de competicións deportivas de ámbito galego. Na organización colaboran o Concello de Ordes, Deporte Galego, a Xunta de Galicia e a Federación Galega de Atletismo, principal responsable da proba.
Coa presenza de máis de trinta lanzadores e lanzadoras e cun programa centrado en tres das disciplinas máis esixentes do atletismo, Vista Alegre volverá ser esta tarde punto de encontro para clubs, deportistas e afeccionados.