Vimbio presenta na Coruña o seu primeiro disco, 'Comeza o Xogo'
Vimbio chega este sábado 2 de maio á Sala Mardi Gras da Coruña para presentar en directo o seu primeiro disco, 'Comeza o Xogo'. A banda galega continúa así unha xira que está a percorrer salas e festivais de Galicia cunha proposta marcada pola forza do rap metal e polos sons máis contundentes da escena alternativa.
O concerto comezará ás 22.30 horas, coa apertura de portas prevista para as 22.00 horas. As entradas anticipadas están dispoñibles desde 8 euros máis gastos de xestión, mentres que o prezo en taquilla será de 14 euros.
Liderado por Álex Arnoso, coñecido polo seu traballo en SonDaRúa, o grupo combina rap, metal, nu metal, punk e hardcore nun directo deseñado para descargar enerxía. A súa música recupera a pegada dos sons dos anos 90 e 2000, pero cun enfoque actual e unha identidade propia dentro da nova escena galega.
'Comeza o Xogo' é a carta de presentación de Vimbio, un traballo no que a banda mestura guitarras potentes, ritmos contundentes e flows directos. Tras os primeiros concertos da xira, o grupo encara agora a cita coruñesa como unha das paradas destacadas antes de continuar o seu percorrido por festivais e novos escenarios.