Vilasantar organiza un encontro para promover o aforro eléctrico mediante unha comunidade enerxética
O Concello de Vilasantar organiza un encontro informativo para presentar o proxecto Vilasantar Enerxía, unha iniciativa que permite ás familias e negocios locais aforrar na factura da luz mediante un modelo de comunidade enerxética sostible e colaborativa.
O acto terá lugar o próximo xoves, 16 de xaneiro, ás 19:00 horas, no local da antiga Cámara Agraria de Présaras. As persoas interesadas poderán asistir sen compromiso, pero recoméndase levar o número de CUPS ou unha factura eléctrica para avaliar se esta opción é vantaxosa para os seus fogares ou negocios.
Vilasantar Enerxía aposta por un sistema que fomenta o uso de enerxías renovables e a xestión compartida entre os veciños e veciñas, permitindo así reducir os custos asociados ao consumo eléctrico e diminuír o impacto ambiental.
Con esta iniciativa, o Concello reafirma o seu compromiso coa transición enerxética e a mellora da calidade de vida da súa cidadanía, promovendo un modelo que podería servir de exemplo para outros municipios interesados en alternativas sostibles.