Unha xornada en Mabegondo prepara á comarca para o eclipse solar de agosto
O ceo será o protagonista este xoves, 30 de abril, en Mabegondo. A Xunta de Galicia, en colaboración coa Reserva de Biosfera Mariñas Coruñesas, organiza unha xornada divulgativa aberta ao público para achegar á cidadanía o eclipse solar que poderá verse este verán, o vindeiro 12 de agosto.
A actividade desenvolverase na sala multiusos da sede da Reserva, en Mabegondo, entre as 09.00 e as 14.00 horas. O obxectivo é explicar como se produce un eclipse, ofrecer pautas para observalo sen riscos e introducir ás persoas asistentes na fotografía deste tipo de fenómenos astronómicos.
A cita enmárcase na preparación dun acontecemento excepcional para Galicia. O eclipse do 12 de agosto producirase ao final da tarde, co Sol baixo no horizonte, polo que as recomendacións oficiais insisten na importancia de buscar lugares con boa visibilidade cara ao oeste e sen obstáculos como edificios, montes ou árbores. No caso da Coruña, a referencia oficial sitúa o inicio do fenómeno arredor das 19.31 horas, o máximo sobre as 20.28 horas e o final preto das 21.22 horas.
A observación segura será un dos eixos da xornada. Turismo de Galicia lembra que mirar directamente ao Sol sen protección axeitada pode causar danos oculares permanentes e advirte de que non serven lentes de sol convencionais, cristais afumados, radiografías, CD nin outros métodos caseiros. Nas fases parciais será obrigatorio empregar protección homologada.
A Reserva de Biosfera Mariñas Coruñesas está recoñecida como Destino Turístico Starlight, unha distinción que acredita a calidade dos ceos nocturnos para a observación astronómica e o compromiso coa protección fronte á contaminación lumínica. Este recoñecemento converte o territorio nun espazo especialmente vinculado ao astroturismo, á educación ambiental e á divulgación científica.
A Xunta tamén está a coordinar cos destinos Starlight galegos a promoción e organización do eclipse, que se verá como total nunha parte de Galicia e de forma parcial no resto do territorio. Segundo Turismo de Galicia, 143 concellos galegos situaranse na zona privilexiada de observación, nun fenómeno que non se producía na Península desde 1912 e que non volverá repetirse con carácter total ata 2180.