Unha xornada de voluntariado actuará en Arteixo para frear a expansión da 'uña de gato' no Areal de Alba
O Areal de Alba, en Sabón (Arteixo), acollerá o vindeiro sábado 8 de agosto, entre as 18.00 e as 20.30 horas, unha xornada de voluntariado ambiental centrada na retirada de Carpobrotus sp., coñecida popularmente como 'uña de gato', unha das especies exóticas invasoras que máis ameazan os ecosistemas dunares do litoral galego.
A actividade está organizada polo Grupo Naturalista Hábitat e ten como obxectivo contribuír á recuperación do hábitat natural da zona mediante a eliminación desta planta, orixinaria de Sudáfrica, que foi introducida con fins ornamentais e para estabilizar os areais, pero que na actualidade se estende con rapidez, desprazando a vexetación autóctona e alterando o equilibrio ecolóxico das dunas.
A participación é gratuíta e está aberta a persoas de todas as idades, aínda que será necesario realizar inscrición previa. As prazas son limitadas e asignaranse por orde de solicitude, confirmándose posteriormente por correo electrónico. A organización facilitará ás persoas participantes toda a información necesaria para o desenvolvemento da actividade, ademais de cobertura mediante un seguro de accidentes e responsabilidade civil.
A xornada enmárcase no proxecto 'Estudo e divulgación do medio mariño e costeiro no GALP GA Sur 2025', unha iniciativa coa que o Grupo Naturalista Hábitat impulsa accións de conservación, recuperación de espazos costeiros e sensibilización ambiental sobre a importancia de protexer a biodiversidade do litoral galego.