Unha xornada astronómica na Casa da Cultura desvelará en Sada os segredos do vindeiro eclipse solar
A conta atrás para o histórico eclipse solar do próximo 12 de agosto xa comezou, e a veciñanza atópase chea de interrogantes sobre como gozar de xeito seguro deste fenómeno astronómico. Co obxectivo de resolver todas as dúbidas e achegar a ciencia á cidadanía, o Concello de Sada preparou un completo programa de divulgación gratuíto na Casa da Cultura que se desenvolverá durante a tarde do vindeiro luns 13 de xullo.
A programación arrancará cunha sesión de observación solar a través dun telescopio astronómico profesional. Esta iniciativa estará dirixida polo experto Javier Ares, integrante de Polaris Menorca, quen guiará aos asistentes para ollar de preto as flamaradas e fulguracións da nosa estrela. Durante o taller, explicaranse as pautas esenciais para o emprego correcto de lentes homologadas e compartiranse curiosidades sobre o sol. A actividade organizarase en catro quendas consecutivas de 30 minutos de duración cada unha, planificadas entre as 17.30 e as 19.30 horas, cun límite de 15 participantes por grupo. Aínda que o acceso é libre, o público que desexe asegurar a súa praza poderá inscribirse no formulario da páxina web municipal, que se habilitará o mércores 8 de xullo a partir das 09.00 horas.
A xornada formativa continuará ás 20.00 horas no auditorio del complexo cultural cunha proxección e unha conferencia didáctica de 90 minutos de duración. O propio Javier Ares encargarase de descifrar os misterios dos eclipses totais e ofrecerá consellos prácticos sobre os mellores puntos xeográficos para contemplalo. A entrada para esta charla será totalmente gratuíta e sen inscrición previa, dispoñendo dun total de 294 butacas ata completar a capacidade do recinto. A organización sinala que a idade mínima recomendada para participar en calquera das propostas é de 8 anos.