Unha vixilia lembrará a Samuel Luiz na Coruña no quinto aniversario do seu asasinato
A cidade da Coruña volverá reunir a cidadanía para lembrar a Samuel Luiz cando se cumpren cinco anos do seu asasinato, un crime motivado pola LGTBIfobia que marcou un punto de inflexión na loita contra os delitos de odio en España.
A asociación LGTBI+ ALAS A Coruña organiza un ano máis unha vixilia en memoria de Samuel, que terá lugar o venres 3 de xullo, ás 20.00 horas, na Avenida de Buenos Aires, á altura do Playa Club, lugar no que se celebrará un acto de lembranza e reivindicación.
O programa incluirá unhas palabras do vicepresidente de ALAS A Coruña, Antonio Díaz López, un minuto de silencio, a interpretación de dúas pezas instrumentais a cargo da saxofonista Sophie Simons, colaboradora da homenaxe desde a súa primeira edición, e unha ofrenda floral dedicada tanto a Samuel Luiz como a todas as vítimas da LGTBIfobia.
Con motivo desta convocatoria, a presidenta de ALAS A Coruña, Sara Crespo, destacou a importancia da sentenza firme do Tribunal Supremo sobre este caso, ao considerar que supuxo 'un paso moi importante na loita contra os delitos de odio e unha mensaxe clara de que a LGTBIfobia ten consecuencias e non pode quedar impune'.
Crespo lembrou tamén que a entidade participou no proceso xudicial como acusación popular e asegurou que a resolución representa a culminación do compromiso adquirido por ALAS coa memoria de Samuel, coa súa familia e coa sociedade.
Desde a organización solicitaron ás persoas que participen na vixilia que manteñan o respecto que merece a memoria de Samuel Luiz durante todo o acto.