Unha 'verbena underground' sumarase ao cartel do Rock in Cambre 2026
O Rock in Cambre 2026 continúa ampliando o seu cartel coa incorporación de Me Fritos and the Gimme Cheetos, unha das bandas máis singulares do panorama estatal pola súa capacidade para transformar cancións populares nun espectáculo de punk-rock melódico cargado de enerxía e sentido do humor.
A formación asturiana, nada en 2016, construíu unha proposta recoñecible a partir dunha fórmula directa e festiva: levar ao seu terreo temas coñecidos polo gran público e convertelos nunha celebración acelerada, participativa e desenfadada. Esa combinación de versións, intensidade e conexión co público fixo que a banda gañase presenza en festivais de referencia.
Nos últimos anos, Me Fritos and the Gimme Cheetos pasou por escenarios como Viña Rock, Resurrection Fest, Tsunami Xixón, As Revenidas, Alterna Festival ou Pirata Beach Festival, compartindo programación con bandas destacadas do rock, o punk e o metal.
A súa chegada ao Rock in Cambre achega unha das propostas máis festivas desta edición, na que o festival segue dando forma a un cartel diverso sen afastarse da identidade rockeira que marcou a súa traxectoria. Sobre o escenario, o grupo aposta por derrubar prexuízos musicais e converter cada actuación nunha experiencia compartida co público.
Me Fritos and the Gimme Cheetos únense así aos nomes xa anunciados de Boikot e Biznaga. A edición de 2026 recuperará os dous días completos de concertos e incluirá tamén a participación de cinco bandas da contorna, reforzando a aposta polo talento local.
O festival continuará anunciando nas próximas semanas novas incorporacións e sorpresas para unha edición que volverá situar Cambre como un dos puntos de encontro da música en directo en Galicia.