Unha unidade móbil da Policía Nacional fará en Sada o DNI e o pasaporte con entrega no momento
Facer o DNI ou o pasaporte sen saír do municipio será posible en Sada en dúas quendas programadas para esta primavera. Un equipo da Policía Nacional desprazarase á localidade os días 24 e 25 de marzo e tamén o 13 e 14 de maio para tramitar documentación, cunha novidade práctica: a entrega dos documentos será inmediata grazas á incorporación de vehículos adaptados para a expedición.
A unidade móbil instalarase na praza da Peixería (na parte traseira da OMIX) e atenderá en horario de 9.00 a 13.00 horas durante as catro xornadas previstas. A Policía estima un cupo de 40 prazas por día, polo que será imprescindible reservar con antelación.
As citas poden solicitarse de xeito presencial na planta baixa do Concello ou por teléfono chamando ao 981 620 075 e marcando as extensións 255 e 200. Para formalizar a reserva, as persoas interesadas deberán facilitar nome e apelidos, DNI e un número de contacto.
No caso da expedición do pasaporte, a Policía Nacional lembra que é necesario presentar unha fotografía recente tamaño carné, contar co DNI en vigor e abonar 30 euros en concepto de taxas. Cando o pasaporte se tramite para menores de idade, deberán estar presentes sempre os dous proxenitores e achegar tamén o Libro de Familia.