Unha rodaxe cinematográfica provocará cortes e restricións de aparcamento a vindeira semana en Sada
A rodaxe dunha produción cinematográfica levará a vindeira semana cambios puntuais na circulación e no estacionamento en diferentes puntos da contorna de As Brañas, debido á ocupación temporal de espazos públicos.
As restricións concentraranse principalmente durante o luns 24 e o martes 25 de agosto, xornadas nas que está previsto o desenvolvemento da gravación. As zonas afectadas estarán sinalizadas previamente para informar á veciñanza das limitacións de uso.
Entre os espazos que poderán verse afectados atópase a rúa Culleredo, así como o aparcadoiro situado entre o tanatorio e o campo de fútbol. Tamén se utilizará temporalmente unha parcela municipal situada xunto ao campo de fútbol e que habitualmente funciona como zona de estacionamento.
Durante o desenvolvemento da rodaxe poderán producirse restricións puntuais á circulación, ao estacionamento e ao acceso a estes espazos, en función das necesidades da gravación e das medidas necesarias para garantir a seguridade.
O Concello recomenda á veciñanza prestar atención á sinalización instalada desde este venres e ter en conta as posibles limitacións á hora de planificar os desprazamentos ou buscar estacionamento na zona.
A administración local pediu tamén comprensión ante as molestias que poidan ocasionarse durante estas dúas xornadas, derivadas dunha ocupación temporal necesaria para permitir o desenvolvemento da produción cinematográfica.