Unha mostra lembra medio século do desastre do Urquiola na costa coruñesa
A Coruña conmemora o cincuenta aniversario da catástrofe do Urquiola cunha exposición dedicada a un dos episodios medioambientais máis graves vividos na costa galega. A mostra, titulada 'Mareas Negras. O desastre do Urquiola', pode verse na rúa Compostela e está organizada polo Instituto de Estudios Coruñeses José Cornide coa colaboración do Concello.
O concelleiro de Cultura e Turismo, Gonzalo Castro, presidiu este martes o acto de apertura ao público da exposición. Na presentación tamén participaron o historiador Xosé Alfeirán e a directora do Instituto José Cornide, Ana Romero Masiá.
A iniciativa busca recuperar a memoria das mareas negras que afectaron a Galicia e analizar as súas consecuencias sobre o medio mariño, desde os danos na flora e na fauna ata o impacto nos bancos marisqueiros e na actividade pesqueira.
O 12 de maio de 1976, o Urquiola, procedente do Golfo Pérsico, preparábase para entrar no porto coruñés cando sufriu un impacto co fondo da baía. A brecha aberta no casco provocou o embarrancamento do petroleiro e o vertido da súa carga, o que deu lugar a unha crise ecolóxica que marcou a memoria recente da cidade e do litoral galego.