Unha glorieta abrirá un acceso máis seguro ao novo centro de saúde de Abegondo
O novo centro de saúde de Abegondo contará cunha conexión máis ordenada e segura desde a estrada AC-542. As obras para habilitar o futuro aparcamento e os accesos avanzan a bo ritmo e completaranse coa construción dunha semiglorieta que dará entrada directa á instalación sanitaria e tamén servirá de saída cara ao CEIP San Marcos e ao pavillón municipal.
O alcalde, José Antonio Santiso, comprobou o estado dos traballos nunha visita coa Axencia Galega de Infraestruturas e persoal técnico municipal. A actuación desenvolverase de forma coordinada entre o Concello e a Xunta: a Administración local asumirá o aglomerado do firme e o organismo autonómico encargarase da sinalización, incluído o pintado da semiglorieta e do vial de acceso.
A intervención incorpora tamén unha senda peonil para facilitar a chegada a pé ao centro sanitario e novas prazas de estacionamento. O rexedor destacou que a obra permitirá dispoñer de 'un acceso directo ao centro de saúde' e mellorará a seguridade nun punto de uso diario para a veciñanza. O Concello prevé, ademais, unha segunda conexión no futuro mediante outra glorieta na AC-542, pensada para enlazar de maneira máis directa co cuartel da Garda Civil e coa propia dotación sanitaria.
O proxecto de aparcamento e accesos saíu a licitación cun orzamento de 198.562,65 euros, IVE incluído, e actúa sobre unha parcela de 1.088,70 metros cadrados situada fronte á fachada principal do centro. Nese espazo proxéctanse 21 prazas, tres delas para persoas con mobilidade reducida e unha reservada para ambulancias, ademais de dous viais interiores de sentido único e zonas axardinadas con mobiliario urbano.
A estas prazas sumaranse outras 12 nas que tamén traballa o Concello e que poderán empregar os profesionais sanitarios. Os traballos inclúen a retirada do peche existente, a limpeza da parcela, o acondicionamento do terreo, a colocación de sinalización horizontal e vertical, bancos e papeleiras.
A mellora dos accesos chega na recta final dun equipamento chamado a renovar a atención primaria no municipio. A Xunta adxudicou a construción do novo centro por 2.708.948 euros, cun edificio de 1.221 metros cadrados construídos e 965 metros cadrados útiles, deseñado para dar servizo a preto de 5.000 pacientes e substituír unha infraestrutura con máis de 35 anos.