Unha factura de 32.000 euros pola luz pon en alerta ás festas de Dorneda e Maianca
As comisións de festas de Dorneda e Maianca enfróntanse a unha situación inesperada tras recibir unha proposta de cobro de 32.023,64 euros pola subministración eléctrica necesaria para as celebracións populares, segundo informou o Concello de Oleiros.
O Goberno local considera que se trata dunha cantidade desproporcionada para colectivos que organizan as festas de maneira altruísta e que dependen, en boa medida, das achegas veciñais e do traballo voluntario. Para evitar que esta situación afecte ao desenvolvemento das celebracións, o Concello anunciou que asumirá o custo dun xerador eléctrico.
Desde o Executivo municipal sosteñen que este tipo de gastos poden poñer en risco a continuidade das festas populares se as comisións non poden facerlles fronte. Estas entidades levan meses preparando programas, recadando fondos e coordinando actividades co obxectivo de manter vivas unhas citas que forman parte da vida social e cultural das parroquias.
As festas de Dorneda comezan este venres, 3 de xullo, e prolongaranse ata o domingo. O programa inclúe actividades para todos os públicos, actuacións das orquestras Costa Dorada e Alkar, degustacións de lagostinos, churrasco e navallas, ademais da terceira edición do Mercado de proximidade.
Coa decisión de financiar un xerador, o Concello busca garantir que os festexos poidan celebrarse con normalidade mentres pon o foco no impacto que os custos eléctricos poden ter sobre a organización das festas veciñais.