Unha exposición na Casa das Ciencias guía á cidadanía ante a eclipse total de agosto
A Casa das Ciencias conta xa cunha nova exposición divulgativa pensada para achegar á cidadanía a eclipse total de Sol que se poderá ver na Coruña o vindeiro 12 de agosto. A mostra está situada na explanada exterior do museo e forma parte da programación impulsada polo Concello para converter esa xornada nun dos grandes acontecementos culturais e científicos do ano na cidade.
A exposición está formada por dous cubos de gran tamaño con oito paneis informativos. A través de textos sinxelos, imaxes e infografías, o público pode coñecer como se produce unha eclipse, por que é un fenómeno tan pouco habitual e que aspectos deben terse en conta para observala sen riscos.
Os paneis explican, por exemplo, que unha eclipse de Sol acontece cando a Lúa se interpón entre a Terra e o Sol e proxecta a súa sombra sobre unha zona concreta do planeta. Tamén amosan que ocorre durante os instantes de totalidade, cando o disco solar queda completamente oculto e poden verse fenómenos moi chamativos, como a coroa solar ou pequenos escintileos de luz arredor da Lúa.
A mostra tamén dedica espazo á historia das eclipses, desde as interpretacións antigas, vencelladas durante séculos ao misterio e á superstición, ata o papel que estes fenómenos tiveron no avance da ciencia. Outro dos paneis lembra que a península Ibérica vivirá tres eclipses solares nos anos 2026, 2027 e 2028, un feito pouco frecuente que sitúa este territorio nun momento especialmente relevante para a observación astronómica.
Un dos apartados máis prácticos céntrase na planificación da xornada do 12 de agosto. Nel ofrécense recomendacións para escoller un lugar axeitado, buscar un horizonte despexado e, sobre todo, protexer correctamente os ollos. O Concello insiste en que a eclipse debe observarse sempre con medios homologados e nunca mirando directamente ao Sol sen protección.
Esta nova proposta súmase a outras actividades xa en marcha, como talleres dirixidos a profesionais do ámbito educativo e sesións en directo no Planetario. Nas próximas semanas tamén se presentará o programa '3CLIPSE', unha iniciativa divulgativa na que participan máis de trinta planetarios, museos e centros de ciencia.
Ademais, o Concello habilitou dous visores interactivos para facilitar que a veciñanza poida localizar puntos de observación en distintos barrios da cidade. A ferramenta busca evitar desprazamentos innecesarios e repartir a afluencia entre diferentes espazos desde os que será posible seguir a eclipse con comodidade e seguridade.