Unha campaña repartirá dous millóns de lentes homologadas para observar con seguridade o eclipse solar do 12 de agosto
O Museo Nacional de Ciencia e Tecnoloxía (MUNCYT) da Coruña acolleu este luns a presentación da campaña de sensibilización 'Unha vista única. Coídaa', unha iniciativa impulsada polo Grupo Social ONCE para promover a observación segura do eclipse total de Sol que poderá verse o vindeiro 12 de agosto. O acto contou coa asistencia da delegada da Xunta na Coruña, Belén do Campo.
A campaña pon o foco na importancia de protexer a saúde visual ante un fenómeno astronómico excepcional e lembra que nunca se debe mirar directamente ao Sol sen utilizar lentes homologadas específicas para eclipses, xa que facelo pode provocar lesións graves e permanentes na vista.
Durante a presentación asinouse o convenio de colaboración entre o Goberno de España e o Grupo Social ONCE para desenvolver esta iniciativa, que inclúe a distribución gratuíta de dous millóns de lentes homologadas entre a cidadanía, ademais de diversas accións de divulgación e prevención.
No acto tamén se deu a coñecer un cupón conmemorativo da ONCE dedicado á campaña, que sairá á venda a partir deste mércores, reforzando a mensaxe de sensibilización arredor do eclipse.
O eclipse total do 12 de agosto será un dos acontecementos astronómicos máis destacados das últimas décadas, xa que será o primeiro visible desde a Península Ibérica en máis de cen anos. Galicia será o primeiro territorio de España desde o que poderá contemplarse a totalidade do fenómeno, converténdose nun dos principais puntos de observación.
A campaña compleméntase coa programación especial que o MUNCYT desenvolve durante este verán, con exposicións, charlas e actividades divulgativas para preparar á cidadanía de cara ao eclipse e fomentar unha observación segura.