Deportes

A primeira edición de 'Pequenos Xigantes' reunirá este sábado 140 escolares de 6 a 12 anos, con 31 equipos de 22 colexios da Coruña e a súa contorna

A praza de María Pita converterase este sábado, 23 de maio, nun gran taboleiro ao aire libre coa celebración do primeiro Torneo de Xadrez Escolar 'Pequenos Xigantes'. A iniciativa está organizada polo Concello da Coruña e a Fundación Recuperación Materiales Diversos (RMD), e combina deporte, educación e conciencia ambiental.

A competición está dirixida a alumnado de Primaria, de entre 6 e 12 anos, e contará coa participación de 140 escolares. En total, inscribíronse 31 equipos procedentes de 22 colexios da cidade e da súa área de influencia. As partidas comezarán ás 10.00 horas, aínda que a recepción está prevista a partir das 9.15 horas.

Un dos elementos máis chamativos do torneo será o material empregado. As pezas de xadrez foron confeccionadas a partir de pneumáticos fóra de uso e, no caso do mega xadrez, utilizaranse máis de 800 rodas recicladas. O obxectivo é que os nenos e nenas descubran o xadrez ao tempo que se achegan á importancia da reutilización e da reciclaxe.

A alcaldesa, Inés Rey, presentou a actividade acompañada polo concelleiro de Educación, Formación e Transformación Tecnolóxica, Juan Ignacio Borrego; pola presidenta da Federación Provincial de ANPAS de Centros Públicos da Coruña, Lidia Paz Lamela, e polo responsable de 'Pequenos Xigantes', Nicolás González. Rey destacou o valor educativo do xadrez, tanto polo seu impacto nas capacidades cognitivas e sociais como polo seu vínculo, nesta proposta, coa sustentabilidade.

O torneo desenvolverase durante toda a xornada. Tras as partidas da mañá, previstas ata as 14.00 horas, haberá unha pausa para xantar e a competición retomarase ás 16.00 horas. A finalización está prevista arredor das 19.30 horas.

Os catro equipos finalistas da cita coruñesa poderán participar na gran final nacional, que se celebrará en León no mes de novembro. A iniciativa naceu precisamente nesa cidade en 2021 e xa pasou por municipios como Zamora, Segovia, Xixón, Valladolid, Ourense, Oviedo ou Santander.