Cultura

O fotógrafo ourensán obtén o galardón da Deputación da Coruña coa serie 'Aventados', seleccionada entre 80 coleccións presentadas

O fotógrafo ourensán Miguel Muñiz gañou o XX Premio de Creación Fotográfica 'Luís Ksado', convocado pola Deputación da Coruña, coa colección 'Aventados'. O xurado concedeu o galardón por unanimidade tras valorar a coherencia narrativa da serie e a súa capacidade para documentar, cunha mirada poética, ás persoas no seu contorno rural.

A decisión fíxose pública tras a reunión celebrada no Pazo Provincial, presidida pola deputada de Cultura, Natividade González. Nesta edición presentáronse 80 coleccións, entre as que o xurado realizou varias roldas de selección ata escoller a obra gañadora e as cinco series finalistas que formarán parte dunha exposición itinerante e do catálogo oficial.

As coleccións finalistas son 'Néboa', de Carlos Folgoso Sueiro, de Verín; 'Terra negra', de Tono Arias, da Estrada; 'Terra de promesas', de Roberto de la Torre Camiña, de Vigo; 'Latencia', de Rodrigo Sánchez Suárez, de Oleiros; e 'La mente vacía', de Raquel López Pajares, de Madrid.

A deputada de Cultura destacou a alta calidade das obras presentadas e subliñou que o Premio Luís Ksado se consolida como un referente para a creación fotográfica. Tamén incidiu na importancia de levar estas propostas visuais aos concellos a través da mostra itinerante que se organizará proximamente.

O xurado puxo en valor en 'Aventados' a súa atmosfera evocadora, o tratamento da cor e o enfoque empregado polo autor, elementos que fan que o vento estea presente ao longo das imaxes. A serie gañadora destaca así por converter o territorio rural e as persoas que o habitan nun relato visual de grande intensidade.

Miguel Muñiz naceu en Ourense en 1966 e formouse na Escola de Artes Aplicadas de Santiago de Compostela, cidade na que reside. Desde 1994 desenvolve a súa carreira profesional como fotoxornalista, cubrindo a actualidade galega como responsable gráfico.

Ao longo da súa traxectoria formou parte do colectivo 'Imaxe Covid', colaborou con distintos medios e publicou como coautor os libros 'Fomos ficando sós o mar o barco e mais nós' e 'Illados, diario da pandemia'. O seu traballo tamén foi exposto en Houston e Portugal e seleccionado en certames internacionais como o 'Wildlife Photographer of the Year', o 'Memorial María Luisa' ou os 'Siena Awards'.

O novo Premio Luís Ksado súmase a unha carreira recoñecida con galardóns como o 'European Newspaper Award' na categoría de secuencias e series ou o premio 'Galicia en Foco', que obtivo en dúas ocasións, nos anos 2003 e 2022. Muñiz xa recibira ademais unha mención de honra no propio certame Luís Ksado na edición de 2024.