Un programa levará ás aulas a prevención da violencia de xénero en mulleres con discapacidade
A Deputación da Coruña apoia con 15.230 euros o proxecto 'VIO 10: Ver para erradicar', impulsado pola Asociación de Mulleres con Discapacidade de Galicia, ACADAR, para sensibilizar o alumnado e o profesorado sobre a prevención da violencia de xénero e sexual contra mulleres e nenas con discapacidade.
A iniciativa está dirixida a estudantes de secundaria, bacharelato, formación profesional e universidade, e busca visibilizar unha realidade que adoita quedar fóra do debate público: a maior vulnerabilidade das mulleres con discapacidade fronte ás distintas formas de violencia machista.
O programa desenvolverase en concellos como A Coruña, Ordes, Ames, Brión, Padrón e Santiago de Compostela, con accións presenciais e tamén formacións en liña adaptadas ás necesidades dos centros educativos. As actividades abordarán cuestións como a igualdade, a discapacidade, a violencia sexual, a violencia vicaria e a violencia dixital.
A deputada de Igualdade, Lingua e Dereitos Civís, Sol Agra, visitou esta semana a sede de ACADAR en Santiago de Compostela para coñecer o traballo da entidade no acompañamento e apoio ás mulleres con discapacidade. A asociación é unha das beneficiarias da convocatoria FOIO0A/2026 da Área de Igualdade da Deputación, dotada con 600.000 euros para programas de políticas de xénero desenvolvidos por entidades sen ánimo de lucro.
ACADAR naceu en 2009 en Santiago de Compostela e foi a primeira asociación galega centrada na defensa da igualdade efectiva das mulleres con discapacidade. Entre os seus obxectivos están promover a autonomía, a participación social e a erradicación das violencias que poden sufrir estas mulleres.
Co apoio provincial, a entidade continuará levando ás aulas ferramentas de prevención e concienciación para avanzar nunha igualdade máis inclusiva e para reforzar a protección de nenas e mulleres con discapacidade fronte ás violencias machistas.