Un percorrido da memoria recuperará este sábado a historia das vítimas de 1936 en Beira
A parroquia de Beira acollerá este sábado, 19 de setembro, a inauguración oficial do Roteiro da Memoria 'As Catalinas', un percorrido que pretende recuperar e divulgar a historia dun dos lugares vinculados á represión de 1936 na provincia da Coruña.
O acto comezará ás 11.30 horas nos aparcamentos situados xunto ao propio percorrido, ao carón da N-550, na intersección coa estrada que conduce ao lugar das Travesas. A inauguración estará presidida pola deputada de Dereitos Civís da Deputación da Coruña, Sol Agra; o alcalde de Carral, José Luís Fernández Mouriño; e o presidente da Asociación Cultural Cultura Aberta, Lois Anxo Ferreiro Bestilleiro.
Tamén está prevista a participación de familiares das vítimas e de diferentes persoas e entidades que colaboraron na creación do itinerario, entre elas os investigadores Luís Lamela e David Lozano, o profesor de Historia da USC Emilio Grandío, o escultor Valdi, o músico e escritor Baldomero Iglesias 'Mero', veciños da parroquia e representantes da Asociación para a Recuperación da Memoria Histórica, o grupo Histagra da USC e Lentes Diverxentes.
Un percorrido de case dous quilómetros
O acto comezará coas intervencións do presidente de Cultura Aberta, a deputada, o alcalde e o investigador David Lozano na primeira mesa interpretativa. A continuación, os asistentes percorrerán o itinerario, con diferentes paradas nas que se ofrecerán explicacións sobre os feitos históricos, as vítimas, as súas familias, os testemuños e a contorna.
A xornada finalizará no cemiterio de Beira, onde terá lugar unha ofrenda floral ante o monumento dedicado ás vítimas de 1936.
O percorrido ten unha lonxitude de 1,92 quilómetros e conta con mesas interpretativas e códigos QR que permiten acceder a información sobre o acontecido neste lugar durante aqueles anos.
A canteira onde foron asasinados polo menos 18 homes
O Roteiro da Memoria 'As Catalinas' céntrase na historia das persoas asasinadas en 1936 neste punto de Beira e explica os feitos relacionados coa represión franquista en Carral.
A canteira das Catalinas, situada no monte das Teixoeiras e xunto á N-550, foi escenario dun dos episodios máis duros da represión no municipio. Segundo a documentación facilitada pola organización, entre o 14 de agosto e o 3 de novembro de 1936 apareceron polo menos 18 homes asasinados neste lugar.
O itinerario segue ademais o mesmo camiño polo que os veciños da parroquia trasladaban en carros tirados por bois e vacas os corpos das persoas asasinadas nos arredores da canteira ata o cemiterio parroquial.
O proxecto pretende dar a coñecer estes feitos e contribuír a recuperar a memoria das vítimas da represión de 1936, así como o testemuño das súas familias e da propia comunidade local.