Un paseo pola ría para descubrir Betanzos desde outra mirada
Betanzos volverá abrir este verán unha xanela diferente ao seu patrimonio coa posta en marcha dunha nova edición das Rutas Guiadas Fluviais, unha proposta turística que permite coñecer a cidade desde a ría e achegarse á súa historia, á súa paisaxe e ao seu vínculo co medio natural.
A actividade, organizada polo Concello de Betanzos a través da área de Turismo, desenvolverase entre os meses de xuño e setembro con diferentes saídas programadas. As rutas partirán desde o Paseo da Tolerancia e estarán guiadas, co obxectivo de ofrecer ás persoas participantes unha experiencia divulgativa e de lecer arredor da relación histórica da cidade co seu contorno fluvial.
Cada saída terá unha capacidade máxima de 50 persoas e será necesario contar cun mínimo de 10 participantes para que a actividade poida realizarse. As prazas son limitadas e cubriranse por orde de inscrición.
As persoas interesadas deberán anotarse previamente na Oficina de Turismo de Betanzos. As reservas poden facerse no teléfono 981 77 66 66, a través de WhatsApp no 638 54 31 69 ou no correo electrónico turismo@betanzos.gal.
O prezo da actividade será de 5 euros para persoas adultas, 1 euro para nenos e nenas de 4 a 12 anos e gratuíto para menores de 4 anos. O pagamento realizarase exclusivamente en efectivo.
O calendario comezará en xuño con saídas os días 16 e 18, ás 16.30 horas; os días 23 e 25, ás 11.00 horas; e o día 30, ás 16.30 horas. En xullo haberá rutas os días 2, 14, 16, 28 e 30, ás 16.30 horas, e os días 7, 9, 21 e 23, ás 11.00 horas.
No mes de agosto, as saídas serán os días 4 e 6, ás 11.00 horas, e os días 11 e 13, ás 16.30 horas. A programación rematará en setembro, con rutas os días 1 e 10, ás 16.30 horas, e os días 3, 8 e 15, ás 11.00 horas.