Un paseo literario seguirá mañá as pegadas de Otero Pedrayo pola Coruña
A memoria literaria de Ramón Otero Pedrayo percorrerá mañá, domingo 24 de maio, as rúas da Coruña cun novo roteiro promovido pola Asociación de Escritoras e Escritores en Lingua Galega. A actividade, titulada Camiñando con Otero Pedrayo pola Coruña, estará guiada por Carme Fernández Pérez-Sanjulián e comezará ás 12.00 horas.
O punto de saída será a praza de María Pita, diante da porta do Concello. A participación é gratuíta e non será precisa inscrición previa, polo que as persoas interesadas poderán achegarse directamente ao lugar de encontro.
A proposta forma parte dos paseos literarios da AELG, unha iniciativa que busca dar a coñecer cidades e vilas galegas a través da mirada de escritoras e escritores, ben a partir das súas propias obras ou de textos vinculados aos espazos que se percorren.
Neste caso, o itinerario estará centrado na presenza de Ramón Otero Pedrayo na Coruña e na relación da cidade coa memoria cultural e literaria galega. A actividade conta co apoio do Concello da Coruña.
O roteiro permitirá descubrir a cidade desde outra perspectiva, vencellando rúas, prazas e espazos urbanos coa figura dun dos grandes nomes da literatura e do pensamento galeguista.