Un obradoiro de emprego formará en Oleiros a 20 persoas para mellorar o Bosque dos Veciños
Oleiros puxo en marcha o obradoiro de emprego dual 'Oleiros Forestal Bosque dos Veciños', unha iniciativa que permitirá formar a 20 persoas desempregadas ao longo de nove meses mentres desenvolven actuacións reais de mellora ambiental e paisaxística neste espazo natural do municipio.
O programa está orientado a reforzar a empregabilidade do alumnado mediante formación teórica e práctica en varias especialidades. As persoas participantes poderán obter certificados de profesionalidade en actividades auxiliares de conservación e mellora de montes, actividades auxiliares en viveiros, xardíns e centros de xardinaría, traballos de carpintaría e moble, e aplicación de vernices e lacas en elementos de carpintaría e moble.
A iniciativa conta cun investimento autonómico de case 547.000 euros, dos que arredor de 92.000 euros se destinan a incentivos vinculados á contratación posterior das persoas participantes, tanto por parte de empresas como do propio Concello de Oleiros.
Durante o desenvolvemento do obradoiro, o alumnado intervirá no Bosque dos Veciños con traballos destinados a mellorar a seguridade, a funcionalidade, a conservación ambiental e o valor paisaxístico deste enclave. O proxecto permitirá así combinar a aprendizaxe profesional cun beneficio directo para a veciñanza.
O modelo de formación dual inclúe contrato, remuneración económica e unha formación práctica vinculada ás necesidades do territorio. A Xunta destaca que este tipo de programas buscan abrir novas oportunidades laborais ás persoas desempregadas e, ao mesmo tempo, contribuír á mellora de espazos públicos de valor ambiental.