Un obradoiro achega a Arteixo a delicada técnica do ñandutí
Unha das artesanías máis singulares de América Latina fará parada esta fin de semana en Arteixo. Seoane Textil organiza o sábado 9 de maio un obradoiro de ñandutí, un delicado encaixe circular tradicional do Paraguai que reproduce con fío as formas dunha tea de araña.
A actividade estará impartida pola artesá Macarena Bordon e desenvolverase en dúas quendas, de 10.00 a 14.00 horas e de 16.00 a 20.00 horas, nas instalacións da empresa, situadas na avenida de Caión, 40. O prezo é de 70 euros e inclúe todos os materiais necesarios para iniciarse nesta técnica, polo que non é preciso ter experiencia previa en encaixe.
O ñandutí, cuxo nome significa literalmente 'tea de araña', ten unha longa historia. A súa orixe está ligada ás técnicas introducidas por mulleres españolas no século XVII e reinterpretadas despois polas artesás guaranís, que converteron este encaixe nun símbolo identitario do Paraguai.
Cada peza trabállase sobre un almofadón con agullas e alfinetes, nun proceso minucioso que pode alongarse durante semanas nas creacións máis complexas. Os deseños adoitan combinar motivos florais e xeométricos, ás veces con decenas de radios que forman composicións de gran precisión.
Con esta proposta, Seoane Textil reforza a súa aposta por vincular aprendizaxe, cultura e artesanía desde Arteixo, achegando á comarca actividades pouco habituais en Galicia. As prazas son limitadas e a inscrición debe realizarse previamente a través da web.