Un novo contrato de socorrismo reforzará a seguridade nas praias de Arteixo durante dous veráns
O Concello de Arteixo vén de sacar a licitación o novo servizo de salvamento e socorrismo para os principais areais do municipio, coa finalidade de garantir a vixilancia e a atención aos bañistas ao longo da tempada oficial de baño. O prego recolle que a cobertura se prestará do 15 de xuño ao 15 de setembro e, como mínimo, en horario diario de 12.00 a 20.00 horas.
A prestación abrangue as praias de 'Suevos', 'Sabón', 'Repibelo/A Salsa', 'Valcovo', 'Combouzas' e 'Barrañán'. No documento detállase tamén o dispositivo por areal, con reforzos destacados en 'Sabón' (6 socorristas acuáticos) e 'Valcovo' (4).
Ademais do labor de prevención e vixilancia, o servizo inclúe actuacións de rescate no medio acuático e primeiros auxilios cando sexa necesario. O operativo complétase cunha base náutica asociada ao porto exterior de Punta Langosteira, que contempla a presenza de dous patróns náuticos no mesmo tramo horario da prestación.
No apartado de medios materiais, o prego recolle a existencia de casetas, torres e cadeiras de vixilancia en distintos puntos, así como equipamento de atención e rescate que se integra no funcionamento do servizo.
O contrato conta cun orzamento de 1.083.230 euros para os dous vindeiros veráns. O Concello engade tamén unha achega de 24.767 euros da Deputación da Coruña destinada a tarefas de limpeza e saneamento.