Un milleiro de corredores toman Os Castros, O Castrillón e Eirís na Volta a Oza
Un milleiro de corredores volveron encher este domingo as rúas da Coruña coa celebración da XIII Volta a Oza, unha das citas xa consolidadas do circuíto Coruña Corre. A carreira marcou o regreso da competición despois do parón estival e levou o deporte popular polos barrios dos Castros, O Castrillón e Eirís, cun percorrido que tivo a súa saída e chegada na contorna do parque de San Diego.
Na categoría absoluta, Jorge Sieira foi o máis rápido da xornada ao completar os 6.250 metros en 21:53. A segunda posición foi para Daniel Fuentes, cun tempo de 22:20, mentres que Alejandro Serrano pechou o podio masculino cun rexistro de 22:25.
Na carreira feminina, Noa Mirantes fíxose coa vitoria tras cruzar a meta en 25:56. Inés Papín foi segunda con 27:51 e Noelia Papín ocupou o terceiro posto cun tempo de 28:03.
A proba absoluta comezou ás 10.00 horas e combinou tramos de asfalto e terra. Desde o parque de San Diego, os participantes percorreron diferentes puntos da contorna, entre eles a avenida da Concordia, os parques de Eirís e Oza e a rolda de Outeiro, antes de regresar ao punto de partida.
Unha mañá dedicada ao deporte popular
Despois da carreira absoluta chegou a quenda das categorías inferiores, cunha programación adaptada ás diferentes idades, desde sub-18 ata a categoría Peques. Os máis pequenos foron os encargados de poñer o punto final ás carreiras coa súa saída ás 12.30 horas.
A entrega de premios contou coa presenza do concelleiro de Deportes, Manuel Vázquez, e do concelleiro de Economía e Planificación Estratéxica e voceiro do Goberno municipal, José Manuel Lage.
Coa Volta a Oza, o Coruña Corre alcanza xa cinco das sete probas previstas para este año. O circuíto retomará a competición o 25 de outubro coa XII Carreira Popular do Ventorrillo e poñerá o punto final á edición de 2026 o 22 de novembro coa XIV Carreira Popular de Novo Mesoiro.