Un mercado de artesanía con raíz galega chega ao Antigo Matadoiro de Betanzos
A artesanía galega terá este sábado 9 de maio unha nova cita en Betanzos coa chegada do mercado Brota do Norte ao Antigo Matadoiro. A proposta reunirá unha selección de marcas con raíz galega e busca converterse nun escaparate para pequenos proxectos creativos, produtores e iniciativas vinculadas ao comercio de proximidade.
O market desenvolverase en horario continuado de 11.00 a 20.00 horas e contará con postos de artesanía, alimentación, música e ambigú. A organización presenta Brota do Norte como unha iniciativa arredor da artesanía e do comercio do norte, cunha primeira parada en Betanzos.
Entre as propostas previstas haberá proxectos relacionados coa xoiería, o scrapbooking, a decoración, o téxtil e a ilustración, ademais doutras marcas convidadas que achegarán produto feito a pequena escala e con identidade propia. A cita quere atraer tanto á veciñanza como ás persoas que se acheguen á cidade durante a fin de semana.
O escenario escollido engade valor á convocatoria. O Antigo Matadoiro Municipal, situado no centro histórico de Betanzos, é un edificio de comezos do século XX, construído en 1910, recoñecible pola súa arquitectura singular, a decoración en ferro e azulexo e o gran arco da súa fachada principal.
Coa colaboración do Concello de Betanzos, Brota do Norte propón unha xornada para mercar, descubrir proxectos artesáns e gozar dun plan cultural e comercial nun dos espazos máis singulares da cidade.