Un libro recolle nove séculos de historia do Mosteiro de San Salvador e reivindica o seu valor patrimonial
O Mosteiro de San Salvador foi escenario este xoves 6 de agosto da presentación oficial de 'Memoria en pedra', unha publicación que percorre a historia e o patrimonio dun dos monumentos máis emblemáticos de Bergondo. O acto celebrouse coincidindo coa festividade de San Salvador e forma parte da programación organizada polo Concello para conmemorar os 900 anos do cenobio.
O libro está asinado polo párroco Rubén Aramburu e polo xornalista e comisario cultural Xosé M. Salgado, que realizaron un traballo de investigación para reunir nun único volume a información dispoñible sobre o mosteiro, marcada pola escaseza de documentación tras a perda do arquivo medieval.
Durante a presentación, a alcaldesa de Bergondo, Alejandra Pérez Máquez, destacou que a publicación constitúe unha peza fundamental para preservar e divulgar a historia local. A rexedora subliñou que o patrimonio do municipio "non é só pedra, senón tamén a memoria viva da veciñanza", e reafirmou o compromiso do Concello coa protección e difusión da riqueza histórica de San Salvador.
Pola súa banda, Xosé M. Salgado explicou que o obxectivo da obra foi recompilar información procedente de diferentes fontes para ofrecer un relato rigoroso e ao mesmo tempo accesible para todos os públicos. Rubén Aramburu realizou un percorrido pola historia do mosteiro e expresou o desexo de que continúe sendo, como ao longo dos séculos, "un espazo de silencio e de escoita", confiando en que o cenobio poida celebrar moitos séculos máis de historia.
O acto contou tamén cun momento especialmente emotivo protagonizado por Antonia Fernández Barbeito, 'Toñita', veciña de Bergondo afeccionada á escritura. As persoas asistentes recibiron unha copia dun relato dedicado ao mosteiro, mentres a súa filla, Katy López Fernández, foi a encargada de recitalo durante a presentación.
A edición de 'Memoria en pedra' constitúe un dos principais fitos da programación impulsada polo Concello de Bergondo para conmemorar o 900 aniversario do Mosteiro de San Salvador, unha celebración que ao longo do ano inclúe actividades culturais e divulgativas para achegar a historia e o patrimonio do monumento á veciñanza e ás persoas visitantes.