Un investimento de 72.000 euros permitirá renovar a rúa A Igrexa e mellorar o saneamento da zona en Miño
O Concello de Miño licita unha actuación para renovar o pavimento e mellorar a drenaxe da rúa A Igrexa, cun orzamento estimado de 72.050 euros. O prazo para presentar ofertas remata o mércores 4 de novembro, ás 23.59 horas.
A intervención desenvolverase nesta vía da zona norte do municipio, que presenta un firme de formigón con numerosas fisuras e unha rede de saneamento unitaria. Este sistema recolle nunha mesma rede as augas residuais e as pluviais, polo que a chegada de chuvias pode saturar o bombeo cara á depuradora e incrementar o consumo enerxético.
O proxecto contempla a instalación dun novo sistema de drenaxe que permita conducir a auga da chuvia ata a rede de pluviais existente na intersección coa rúa Loios. Unha vez executada esta actuación, procederase á pavimentación dos 190 metros da rúa A Igrexa e á sinalización correspondente.
O prazo estimado para completar os traballos é de dous meses. A intervención busca mellorar o estado da calzada e optimizar o funcionamento da rede de saneamento, reducindo a entrada de auga pluvial no sistema destinado ás augas residuais.
O alcalde, Manuel Vázquez Faraldo, considera que se trata dunha actuación necesaria para reducir o risco de problemas técnicos na depuradora, optimizar o saneamento e diminuír os custos asociados ao seu funcionamento, especialmente ante a chegada da época de chuvias.