Un incendio nunha nave abandonada mobiliza os servizos de emerxencia en Culleredo
Un incendio declarado esta tarde nunha nave abandonada de Cordeda, en Culleredo, obrigou a mobilizar os servizos de emerxencia e as forzas de seguridade. O aviso produciuse arredor das 16.45 horas e ata o lugar desprazáronse efectivos do Servizo Municipal de Emerxencias, dos Bombeiros do Parque Comarcal e da Policía Local de Culleredo.
As lapas afectaron a un habitáculo do inmoble, unha construción que se atopaba en estado de abandono e que apenas conservaba parte da cuberta. Segundo a información facilitada polo Concello, o lume iniciouse nunha acumulación de material, principalmente madeira, aínda que polo momento se descoñecen as causas que provocaron o incendio.
O Servizo Municipal de Emerxencias traballou na extinción das lapas xunto cos Bombeiros do Parque Comarcal, que se incorporaron ao operativo para garantir a seguridade da zona e evitar que o lume se propagase a outros puntos da nave ou da contorna.
Ata o lugar tamén acudiu a Policía Local, que colaborou no dispositivo despregado en Cordeda. Non houbo que lamentar danos persoais.
Ás 17.10 horas, o incendio atopábase xa en vías de extinción, segundo trasladaron fontes municipais.