Un estudo do CICA desvela o papel esencial das Áreas Mariñas Protexidas galegas na conservación ambiental
Un estudo liderado polo investigador Pablo Pita, do Grupo de Investigación en Bioloxía Evolutiva (GIBE) do Centro Interdisciplinar de Química e Bioloxía (CICA) da Universidade da Coruña (UDC), revela que as Áreas Mariñas Protexidas (AMPs) galegas xogan un papel crucial na conservación ambiental e no fortalecemento das comunidades locais. Publicado recentemente na prestixiosa revista científica Ecology and Society, o traballo analiza os servizos ecosistémicos proporcionados por tres AMPs: o Parque Nacional Marítimo-Terrestre das Illas Atlánticas de Galicia, a Reserva Mariña de Interese Pesqueiro dos Miñarzos e o Parque Natural de Cabo de Gata-Níjar, en Andalucía.
As Illas Atlánticas, recoñecidas pola súa biodiversidade e pola presión turística que reciben, destacan como un exemplo de xestión orientada á protección da natureza. Pola súa banda, a Reserva dos Miñarzos, localizada en Lira (Carnota), é unha pioneira en Galicia pola súa xestión participativa, que involucra directamente aos pescadores locais na protección dos recursos mariños. Este modelo fomenta a produtividade pesqueira sostible, crea novas oportunidades económicas e minimiza os conflitos entre a actividade pesqueira e a conservación.
O estudo subliña que estas áreas protexidas non só preservan a biodiversidade mariña, senón que tamén contribúen á seguridade alimentaria, ao desenvolvemento económico e á mellora da calidade de vida das comunidades próximas. Entre os beneficios identificados, destacan o fomento do turismo sostible, o apoio á pesca artesanal e a mitigación de problemas ambientais, como a contaminación e a sobrepesca. Ademais, o artigo pon de manifesto como factores como a proximidade a centros urbanos, unha boa gobernanza e unha xestión eficiente poden influír no éxito destas AMPs.
A investigación é unha mostra do compromiso do CICA, recoñecido como centro de excelencia pola Xunta de Galicia, na exploración de novas estratexias para a conservación ambiental e o uso sostible dos recursos naturais. O CICA, que conta con máis de 200 investigadores, promove a igualdade de xénero e a atracción de talento, consolidándose como un referente internacional na transferencia de coñecemento á sociedade. Na investigación tamén participan as Universidade de Almería e a Universidade de Santiago.