Un espectáculo inmersivo poñerá o broche final ao curso da Escola de Teatro Lisístrata en Arteixo
A Capela do Balneario de Arteixo acollerá o vindeiro 28 de xuño, ás 18.00 horas, a representación de 'Finximentos sonoros', un espectáculo inmersivo e sonoro co que a Escola de Teatro Lisístrata porá o broche final ao curso desenvolvido entre os meses de xaneiro e xuño.
A proposta permitirá ao público asistir a unha sesión de micropezas en vivo concibidas para estimular a imaxinación e a escoita nunha experiencia diferente, centrada no son e na interpretación. A entrada será libre e de balde ata completar aforo.
A mostra servirá ademais para dar visibilidade ao traballo realizado durante os últimos meses polo alumnado do obradoiro, dirixido pola actriz, formadora teatral e presidenta da Asociación Lisístrata, Ana Hermida.
Segundo explica a propia directora, unha das características do proxecto foi o seu carácter aberto e inclusivo, sen límites de idade para participar. O grupo estivo formado por persoas de perfís e idades moi diferentes, algunhas procedentes incluso doutros concellos, que compatibilizaron os ensaios con obrigas familiares, laborais ou problemas de saúde.
Hermida destaca o compromiso amosado polos participantes durante todo o proceso e asegura sentirse especialmente orgullosa do resultado final. A responsable do obradoiro sinala que moitos dos integrantes afrontaban por primeira vez o reto de actuar diante do público, superando medos e inseguridades para formar parte dunha experiencia colectiva baseada no compañeirismo e na aprendizaxe compartida.
A representación do 28 de xuño será unha oportunidade para coñecer o traballo desenvolvido por este grupo afeccionado e pechar unha nova edición dunha iniciativa que aposta por achegar as artes escénicas a persoas de todas as idades.