Un drakkar de inspiración vikinga fará escala en Sada esta fin de semana
O porto de Sada prepárase para recibir esta fin de semana unha embarcación moi pouco habitual. O Orkan, un drakkar de inspiración viquinga pertencente á asociación francesa Bátar, fará escala na localidade os días 29 e 30 de agosto dentro da Expedición 2026.
A embarcación atópase realizando unha travesía de seis semanas desde o Mediterráneo ata Bretaña, percorrendo durante estas xornadas as costas portuguesas e galegas. A viaxe ten como obxectivos poñer a proba o barco, completar a formación da súa tripulación e preparar o que será o seu próximo gran desafío, unha travesía transatlántica cara a América prevista para 2027.
Durante a súa estancia en Sada, o Orkan poderá ser coñecido de preto por veciños e visitantes, que terán a oportunidade de achegarse á embarcación, coñecer o proxecto que hai detrás desta expedición e compartir experiencias coa súa tripulación.
Unha entrada no porto acompañada por embarcacións tradicionais
A chegada do drakkar contará ademais cun recibimento especial por parte de Os Patexeiros, que acompañarán o Orkan durante a súa entrada no porto de Sada a bordo das súas propias embarcacións.
O encontro permitirá unir dúas formas de entender a navegación que, malia as súas diferenzas, comparten o vínculo coa tradición marítima e coa conservación dos coñecementos relacionados co mar.
Ao longo da fin de semana tamén están previstos diferentes encontros para achegar o proxecto do Orkan á cidadanía e coñecer máis detalles sobre a súa tripulación e sobre a expedición que está realizando.
A visita supón así un encontro entre culturas e tradicións mariñeiras de distintos puntos de Europa, co mar e a navegación como elemento común.