Un concurso de booktrailers reta á mocidade de Culleredo a levar a literatura galega á pantalla
A literatura galega volverá atopar este ano unha nova vía de entrada entre o público máis novo en Culleredo. O Concello, a través do CIPAX, puxo en marcha a segunda edición do seu concurso de booktrailers, unha proposta coa que busca unir lectura, creatividade audiovisual e novas linguaxes arredor do Día das Letras Galegas de 2026.
A convocatoria está dirixida á mocidade de entre 13 e 29 anos, que poderá participar de maneira individual ou en grupo reinterpretando obras da literatura galega a través de vídeos breves. A idea é trasladar ao formato audiovisual a atmosfera, o ton ou a esencia dun libro, sen necesidade de resumir toda a historia, e abrir a porta a propostas moi distintas, desde pequenas curtametraxes ata animacións, colaxes visuais ou pezas máis experimentais.
Desde a organización subliñan ademais o carácter accesible do certame, pensado para que a participación non dependa de medios profesionais. O obxectivo pasa por favorecer a creación entre a xente nova e por achegar os textos galegos a códigos visuais máis próximos ás xeracións que se moven a diario entre o vídeo curto, as redes e a edición dixital.
A iniciativa dá continuidade a unha primeira edición celebrada en 2025, da que o Concello fixo públicos os gañadores o pasado mes de xullo. Naquela ocasión, as pezas premiadas foron 'A muller paxaro', de Cristina Varela e Bruno Ramos, e 'O lapis do carpinteiro', de Adrián Gómez, nun certame que xa nacera co propósito de promover a lectura e a creatividade audiovisual entre a mocidade cullerdense.
O novo concurso repartirá premios de ata 300 euros en material cultural ou tecnolóxico, ademais de vales para libros noutras propostas destacadas. Con esta segunda edición, Culleredo reforza unha liña de traballo na que a promoción da cultura galega se combina co impulso a formatos actuais de creación e expresión xuvenil.