Un alumno do Liceo La Paz levará a Galicia á final nacional de 'Que é un rei para ti?'
Diego Fariña, alumno do Colexio Liceo La Paz da Coruña, representará a Galicia na fase nacional da 45ª edición do concurso 'Que é un rei para ti?', unha iniciativa dirixida a escolares desde 3º de Primaria ata 2º da ESO.
O estudante coruñés foi proclamado gañador da fase autonómica cun traballo titulado 'A Coroa, un imán que nos mantén unidos e en equilibrio'. A súa proposta consiste nunha maqueta que simboliza a unión de forzas e o equilibrio necesario para que unha sociedade funcione.
Na fase galega participaron 1.032 traballos procedentes de 115 centros educativos. O fallo do xurado deuse a coñecer durante un acto no que tamén se inaugurou a exposición cos 41 traballos finalistas.
O director xeral de Centros e Recursos Humanos, Jesús Álvarez, participou na lectura do fallo e felicitou tanto ao gañador como ao conxunto do alumnado participante, destacando a imaxinación, o talento e a creatividade amosados nas propostas.
Como gañador autonómico, Diego Fariña asistirá xunto cos representantes doutras comunidades a unha audiencia co rei Felipe VI e realizará unha visita ao Palacio Real. Nese encontro terá tamén a oportunidade de explicarlle ao monarca o contido do seu traballo.
O certame, promovido pola Fundación Institucional Española FIES co patrocinio da Fundación Orange, busca achegar ao alumnado á figura do xefe do Estado e ao seu papel na sociedade. A edición deste ano continúa a incorporar formatos tradicionais, como debuxos, redaccións ou esculturas, xunto con propostas vinculadas á robótica, á infografía ou á animación en 3D.