Últimos días para participar na carreira solidaria que encherá O Burgo de deporte contra o párkinson
Xa quedan poucos días para inscribirse na V Carreira e Andaina Solidaria polo Párkinson, que se celebrará o próximo 18 de outubro no Paseo Marítimo do Burgo, en Culleredo. A iniciativa, organizada pola Asociación Párkinson Galicia-Coruña, combinará deporte e solidariedade nunha edición especialmente significativa para a entidade, que este ano cumpre 30 anos de actividade.
As inscricións permanecerán abertas ata o luns 5 de outubro. As persoas que non poidan participar presencialmente tamén terán a opción de colaborar mediante o Dorsal Cero, dispoñible a través da mesma plataforma de inscrición.
O programa contará cunha carreira cronometrada de 10 quilómetros, con categorías masculina e feminina, e cunha andaina de 4 quilómetros aberta a participantes de todas as idades.
A recadación destinarase integramente á asociación
Un dos principais obxectivos da xornada é conseguir fondos para manter os programas de atención da Asociación Párkinson Galicia-Coruña. O 100% da recadación irá destinado aos servizos e proxectos que a entidade ofrece ás persoas con párkinson e outros parkinsonismos, así como ás súas familias.
A asociación conta cun equipo interdisciplinar que presta servizos de fisioterapia, logopedia, traballo social, psicoloxía e neuropsicoloxía, ademais de desenvolver actividades de información, formación e sensibilización.
A carreira servirá tamén para dar visibilidade a unha enfermidade neurodexenerativa que afecta a máis de 13.000 persoas en Galicia, segundo os datos facilitados pola organización.
A cita pretende reunir de novo centos de participantes nunha xornada na que a actividade física se combinará coa sensibilización social e co apoio aos programas destinados a mellorar a calidade de vida das persoas afectadas e das súas familias.