Trump e Netanyahu arderán na gran falla de San Xoán de Bastiagueiro
Oleiros ultíma os preparativos para celebrar unha nova edición da noite de San Xoán, unha das citas máis multitudinarias do calendario festivo local, que terá o seu principal foco de atención na praia de Bastiagueiro coa tradicional gran falla organizada polo Concello.
A figura central da falla deste ano estará protagonizada polo presidente dos Estados Unidos, Donald Trump, e polo primeiro ministro de Israel, Benjamin Netanyahu. Segundo explicou o alcalde, Ángel García Seoane, a escenificación pretende representar unha crítica ás políticas impulsadas por ambos dirixentes no escenario internacional.
O acendido da falla está previsto para as 0.00 horas do 24 de xuño na praia de Bastiagueiro. Antes, segundo avanzou o rexedor, haberá diferentes intervencións e elementos sonoros que formarán parte da posta en escena da tradicional queima.
Para facilitar a celebración e evitar a utilización de materiais contaminantes ou perigosos, o Concello distribuirá leña de forma gratuíta desde as 20.00 horas en varios puntos do municipio. Os lugares habilitados serán os accesos á praia de Bastiagueiro, a caseta de socorrismo de Santa Cristina, a praza do Castelo de Santa Cruz e a zona do peirao de Mera.
Ademais, Policía Local, Garda Civil e o Servizo Municipal de Emerxencias e Protección Civil desenvolverán un operativo especial para garantir a seguridade durante a celebración. Entre outras medidas, estará prohibida a queima de palés, sofás ou outros elementos que poidan conter cravos ou materiais perigosos, así como a introdución de vidro nos areais.
O Concello tamén lembra que as fogueiras nas praias non poderán instalarse antes das 20.00 horas e deberán estar completamente extinguidas antes das 4.00 horas da madrugada. A esa mesma hora deberán quedar desaloxados os areais para facilitar os traballos de limpeza.
A administración local insiste na importancia de respectar as normas de seguridade e convivencia para que a celebración poida desenvolverse sen incidentes. As persoas que solicitaron autorización para realizar fogueiras deberán cumprir as condicións establecidas e atender en todo momento ás indicacións dos servizos de emerxencia.