Trinta e un locais da cidade participan nas 'IX Xornadas do Lacón con Grelos'
Este luns presentáronse no Concello da Coruña as IX Xornadas do Lacón con Grelos, coñecidas como 'Lacónicas', que se desenvolverán entre o 8 de febreiro e o 3 de marzo en 31 establecementos hostaleiros da cidade.
O concelleiro da Área de Fomento e Promoción da Cidade, Gonzalo Castro, estivo acompañado no acto pola concelleira de Turismo, Diana Cabanas. Tamén asistiron representantes de diferentes negocios participantes: La.Con.Fusión (Manuel Souto), Lois (José Álvarez), Central Park (Fernándo Estévez), O Carrusco (Víctor Loureiro), Hünico (David Núñez e Luciana Casavilca) e Rincón del Reino (David Mariño).
Durante a súa intervención o concelleiro Gonzalo Castro indicou: "Por tradición, somos unha cidade que vive estas datas de maneira moi intensa, xa sexa enchendo as rúas de disfraces ou nas casas e restaurantes, gozando dunha boa lacoada". O concelleiro destacou que desde o Goberno local trabállase da man do sector hostaleiro para ofrecerlles este tipo de iniciativas, que tamén serven para que a cidadanía goce de menús de lacón con grelos a prezos que van dos 20 aos 40 euros.
Este evento, organizado polo Concello, contribúe a dinamizar cada ano o Entroido na Coruña e exaltar ao mesmo tempo a riqueza gastronómica desta época. Todos os menús deberán estar elaborados principalmente con produtos galegos e de quilómetro cero. Os menús deberán estar compostos por un primeiro tradicional (sopa ou similar), a lacoada, sobremesa tradicional (filloas e/ou orellas ou postre típico do Entroido) e bebida (auga/refrescos/cervexa/adega de denominación de orixe galega).
Os establecementos que ofrezan servizo a domicilio ou recollida no local deberán ofrecer un servizo sostible con recipientes e materiais respectuosos co medio ambiente (recipientes biodegradables, bolsas de papel etc). Tamén hai establecementos que teñen ofertas especiais para grupos.
Nesta edición de Lacónicas participan:
- A Fuego Lento
- A Taberna de Cunqueiro
- Ajetreo Taberna
- Áncora
- Asador Coruña
- O Hotel Attica21 Coruña
- Bar Amsterdam Orzán
- Bar Ciudad
- Bodega Órdenes
- Central Park
- Cervexería Moncho
- Cosecha81
- Dos Raíces
- Galiur
- La Tribu
- La.Con.Fusion
- Lois
- Mahara Taberna Rock
- Marea Baja
- Mesón de Herves
- Mesón O'Bo
- Carrusco
- Portela
- Restaurante Eira
- Restaurante Esencia
- Restaurante Hünico
- Resturante Morriña
- Riscón del Reino
- Taberna O Freixo
- Tapa Negra
- Vermutería Chiquín