Tres rúas do centro urbano serán renovadas a partir de xuño en Arteixo
As rúas Pedro de Monteagudo, Domingo de Andrade e Maestro Mateo, no barrio histórico da Cachada, serán obxecto dunha urbanización integral a partir da primeira semana de xuño. A actuación busca mellorar a accesibilidade, renovar servizos e ordenar un ámbito moi transitado do centro urbano de Arteixo.
As obras provocarán cortes puntuais de tráfico, aínda que o Concello asegura que os residentes manterán o acceso ás súas vivendas e garaxes. No caso de que os traballos afecten temporalmente á entrada dalgún garaxe, os veciños serán avisados de forma individualizada. Tamén se sinalizarán os cambios na circulación que poidan producirse durante a execución do proxecto.
As tres rúas conectan a contorna da residencia de maiores, situada xunto ao paseo fluvial, coa travesía de Arteixo. A súa antigüidade e a estreiteza dalgúns itinerarios peonís fan necesaria unha intervención para dar continuidade ás beirarrúas, ampliar espazos accesibles e mellorar a seguridade viaria.
O proxecto foi adxudicado por 554.000 euros e chega despois da obtención dos terreos necesarios para poder ampliar determinados puntos das rúas. A actuación incluirá a renovación de firmes e pavimentos, a mellora das redes de fecais e pluviais, a reparación dun tramo da rede de abastecemento de auga e a actualización da sinalización horizontal e vertical.
Tamén está previsto soterrar unha liña eléctrica para eliminar barreiras arquitectónicas, reorganizar as prazas de estacionamento e as zonas de contedores, ampliar a rede de alumeado público con tecnoloxía LED e instalar mobiliario urbano nun ámbito que actualmente carece deste equipamento.
O Concello enmarca esta intervención dentro das actuacións de mellora do casco urbano e da humanización de espazos residenciais consolidados. O obxectivo é que estas rúas gañen en accesibilidade, seguridade e calidade urbana unha vez rematados os traballos.