Deportes

O club asinou unha destacada actuación no segundo provincial da Coruña, con tres títulos, tres podios máis e a clasificación completa do equipo

O club Ausarta Bergondo regresou do segundo provincial da Coruña cun resultado redondo: todas as súas ximnastas conseguiron a clasificación para o Campionato Galego. A entidade confirmou así o seu bo momento competitivo nunha cita na que se puido ver o traballo realizado durante a tempada.

A competición deixou varios éxitos para o club bergondés. O conxunto cadete escolar proclamouse campión provincial, do mesmo xeito que Sara Martínez, na categoría alevín promoción, e Sara Villar, en infantil promoción.

Tamén subiron ao podio Carolina Villar, segunda en infantil promoción; Inés Bello, segunda en cadete prebase; e Valeria Pereira, terceira en infantil promoción. O conxunto infantil escolar completou a participación cun cuarto posto.

Desde Ausarta Bergondo destacaron o esforzo, a ilusión e a valentía das súas ximnastas, así como o labor do equipo técnico e o apoio das familias. O club afronta agora o Campionato Galego coa confianza reforzada tras unha fase provincial na que todas as deportistas cumpriron o obxectivo.