The Recce e Moon Safari encabezan o palmarés da novena edición de INTERSECCIÓN
INTERSECCIÓN, o Festival Internacional de Cine da Coruña, deu a coñecer o palmarés da súa novena edición, que se celebrou do 13 ao 17 de outubro. The Recce, do cineasta Daniel Mann, obtivo o Premio do Xurado da Sección Internacional, o principal galardón do certame, mentres que Moon Safari, de Hugo Amoedo, foi distinguida co Premio Galicia.
O xurado internacional tamén recoñeceu Con permiso de la autoridad eclesiástica, de Jesús Lacorte, co premio ao Mellor Curtametraxe Española. Este galardón permite á obra optar aos Premios Goya da Academia das Artes e das Ciencias Cinematográficas de España. Pola súa banda, Stallion y la bola de cristal, de Christian Avilés, recibiu o Premio Fulgor.
O premio principal da Sección Internacional recaeu en The Recce, unha película que, segundo o xurado, converte a procura de localizacións cinematográficas nun acto político. A obra reflexiona sobre as relacións entre as imaxes, os territorios e o poder, e sobre como a construción da imaxe dun lugar pode implicar a desaparición daquilo que xa existe.
No caso de Con permiso de la autoridad eclesiástica, o xurado valorou a súa aproximación delicada ao dó. A través dunha road movie na que o absurdo e o humor conviven coa dor da perda, a película constrúe unha reflexión sobre os vínculos familiares, a memoria e as pegadas que deixan as persoas que xa non están.
Na Sección Galicia, o recoñecemento foi para Moon Safari, de Hugo Amoedo. O xurado destacou a súa capacidade para abordar, desde unha linguaxe sinxela e poética, a importancia das pequenas cousas, así como a autenticidade e a emoción dunha historia sobre o crecemento persoal, os cambios e a evolución.
Pola súa banda, Stallion y la bola de cristal, de Christian Avilés, foi a obra premiada na sección Fulgor. O xurado salientou a súa atmosfera sensual e hipnótica e a súa exploración da soidade adolescente, a espiritualidade e o desexo desde unha perspectiva queer. Nesta mesma sección, Insecticida, de Paula Gallego, obtivo unha mención especial do xurado e o Premio do Xurado Xove.
O resto dos galardóns recoñeceron propostas de distintas procedencias e estilos. No hay camino, de Luciana Espinoza Hoempler, recibiu unha mención do Xurado Xove, mentres que O corpo de Cristo, de Bea Lema, foi distinguida co Premio do Xurado Sénior e cos premios NUMAX e MAV. A mención do Xurado Sénior recaeu en Fun abalar a pedra que está no medio do mar, de Breogán Xague.
O público escolleu no_mercy_in_Mexico, de Óscar Asán, como gañadora do seu premio, mentres que Rachar en dous, de Area Erina, recibiu o Premio Contemporánea.
Os Premios Nexus recoñecen tres proxectos
No apartado dos Premios Nexus, o galardón Proxecto Materna foi para Libro, Trinchera, Árbol, de Marina Siero. O Premio Impronta recaeu en Ensayo para una revuelta, de Pilar Monsell, e o Premio D’A distinguiu Larga distancia, de Miguel Eek.
INTERSECCIÓN aposta polo cine de autor máis libre e por propostas independentes que exploran novas linguaxes cinematográficas a través da innovación e do risco creativo. O festival combina a presenza de cineastas internacionais coa promoción do cine español e galego, e defende a diversidade, a experimentación e a curiosidade na creación audiovisual.
A celebración do certame conta co apoio do ICAA, AC/E PICE, AGADIC, a Deputación da Coruña, a Fundación Luis Seoane e o Concello da Coruña. No caso de Nexus, a organización conta tamén co apoio do Ministerio de Cultura.