Tarambainas e Xacarandaina dominan o XXVI Concurso de Música Tradicional de Xiradela en Arteixo
A música tradicional galega volveu soar con forza en Arteixo na XXVI edición do Concurso de Música Tradicional de Xiradela, unha cita que converteu o auditorio do Centro Cívico Cultural nun punto de encontro para preto de 300 pandeireteiros e pandeireteiras chegados de diferentes puntos de Galicia. Ao longo do día, e en sesións de mañá e tarde, pasaron polo escenario case 40 grupos pertencentes a 20 agrupacións.
As formacións máis destacadas desta edición foron a A.C.F. Tarambainas de Vigo e a A.C. Xacarandaina da Coruña, que concentraron boa parte dos principais recoñecementos. Na categoría A, o primeiro premio foi para ‘Teceláns’, da A.C.F. O Fiadeiro de Vigo. Xa na categoría B, o triunfo correspondeu a ‘Xoaniñas’, de Xacarandaina. En categoría C, o primeiro posto recaeu en ‘Laretas’, da A.C.F. Tarambainas, mentres que en categoría D o máximo galardón foi para ‘Tarambainas’, tamén da formación viguesa.
O concurso repartiu unha dotación próxima aos 3.000 euros entre as catro categorías, ademais dos trofeos ao mellor vestiario. Entre os premios máis destacados figuraron os 500 euros para o gañador da categoría D, os 400 euros para o primeiro clasificado da categoría C e os 300 euros reservados para os vencedores das categorías A e B.
No resto do palmarés, na categoría A completaron os postos de honra ‘Ardora’, de Xacarandaina, e o ‘Grupo E’, de Cantigas e Agarimos de Compostela, mentres que o premio ao mellor vestiario foi para ‘Picariñas’, de Vai de Roda. Na categoría B, ‘Titiriteiras’, de Tarambainas, acadou o segundo premio e tamén o recoñecemento ao mellor vestiario, e ‘Moreniñas’, de Vai de Roda, foi terceira. En categoría C, ‘Areíñas’, da Asociación Cultural Soalleira, e ‘Falangueiras’, de O Fiadeiro, ocuparon a segunda e terceira posición, e ‘Laretas’ levou tamén o premio ao mellor vestiario. Na categoría D, ‘Grupo A’, de Retranqueiros, e ‘Garuleiros’, de Donaire, completaron o podio, mentres que ‘Argalleiros’, de Xacarandaina, foi distinguido polo seu vestiario.
Durante a xornada soaron coplas recollidas en lugares como Limiñoa, Montemaior, Piornedo, Avión ou Anxeriz, acompañadas por instrumentos de percusión tradicionais como pandeiretas, pandeiros, pandeiras, pratos, cunchas, trepias, botellas e latas. O certame tamén destacou pola resposta do público, cunha asistencia acumulada de arredor de 1.000 persoas e unha notable rotación de espectadores ao longo de todo o domingo.
As agrupacións participantes chegaron de localidades como A Coruña, Ames, Boimorto, Carballo, Coirós, Compostela, Lugo, Ponteareas, Ponteceso, Rianxo, Sada, Sanxenxo, Teo, Trazo ou Vigo, entre outras. Nesta convocatoria non competiron os grupos da Asociación Xuvenil Xiradela, anfitrioa e organizadora do evento, no que colabora o Concello de Arteixo.
O xurado estivo integrado por Ana García Otero, Violeta Piñeiro Barros e Ricardo Graíño, que valoraron a autenticidade das pezas tradicionais, a dificultade, a afinación e a interpretación. Ademais, esta 26.ª edición puido seguirse tamén en liña a través da canle de YouTube de Xiradela.
Fundada en 1982, a Asociación Xuvenil Xiradela mantén unha intensa actividade arredor da recuperación e difusión do folclore galego. O Concurso de Música Tradicional, nacido no ano 2000, consolidouse como unha plataforma para impulsar a participación da mocidade, favorecer o intercambio entre agrupacións e reforzar o coñecemento da cultura popular galega.