SOS Sanidade Pública chama a mobilizarse polas listas de agarda nos hospitais e centros de saúde
SOS Sanidade Pública convocou concentracións nas cidades galegas este xoves 4 de xuño para denunciar a situación das listas de agarda e reclamar medidas que melloren a atención sanitaria. Na Coruña, a mobilización terá lugar ás 11.00 horas na rotonda do CHUAC.
A plataforma advirte de que a falta de accesibilidade ao sistema sanitario, da que as demoras asistenciais son un dos principais indicadores, afecta directamente á calidade da atención e pode ter consecuencias graves para os pacientes. Por iso, chama á cidadanía a participar nas protestas e a esixir solucións ante unha situación que, segundo sostén, pode afectar a calquera persoa en calquera momento.
Entre as súas demandas, SOS Sanidade Pública reclama incrementar os recursos da Atención Primaria, poñer a pleno rendemento os hospitais públicos, acabar coas derivacións a centros concertados e garantir a dedicación exclusiva do persoal sanitario conforme á Lei de Incompatibilidades.
A organización tamén denuncia o deterioro da imaxe da sanidade pública e alerta de que esta situación favorece a contratación de seguros privados e as derivacións cara á sanidade privada. Ademais, acusa o Sergas de manipular as listas de espera e ocultar parte dos pacientes afectados polas demoras.
Con esta convocatoria, SOS Sanidade Pública busca frear o que define como unha dexeneración do sistema sanitario e reclamar unha resposta inmediata para reducir os tempos de espera e reforzar a asistencia nos hospitais e centros de saúde.