Sete ouros impulsan ao ITF Brigantium tras unha intensa cita en Ourense
O ITF Brigantium regresou de Ourense cun balance moi positivo tras participar nunha intensa xornada de kickboxing con dúas citas diferenciadas: a vixésimo terceira edición do Trofeo Cidade de Ourense e a velada de ring 'Galicia contra Portugal'.
O club desprazou sete deportistas, que competiron en distintas modalidades de combate e pecharon a proba cun total de sete medallas de ouro e sete de prata. O resultado confirma o bo momento competitivo da entidade e a súa capacidade para manter presenza nos podios en diferentes categorías.
Durante o Trofeo Cidade de Ourense, o ITF Brigantium destacou especialmente nas modalidades de kicklight, light contact, point fighting e K1. A expedición asinou unha actuación sólida, con varios triunfos individuais e finais moi competidas, nunha xornada marcada tamén polo cansazo acumulado e as altas temperaturas.
A presenza do club continuou pola tarde na velada 'Galicia contra Portugal', na que tres integrantes do ITF Brigantium foron seleccionados para formar parte do equipo galego. Sandra logrou unha vitoria por decisión unánime, Paula impúxose por KO técnico aos poucos segundos de combate e Román quedou preto do triunfo nun duelo moi igualado que se decidiu por decisión dividida.
A achega dos deportistas do club foi importante para que Galicia conseguise a vitoria final pola mínima, con cinco combates gañados fronte a catro do equipo portugués.
Tras este novo éxito, o ITF Brigantium xa centra a súa preparación no Campionato de España júnior, que se celebrará na última semana de xuño en Alcobendas. O club acudirá á cita con sete deportistas e un seleccionador autonómico.