Seis empresas optan a construír 264 novas vivendas públicas en Xuxán
A Xunta recibiu seis ofertas para redactar o proxecto, dirixir as obras e construír 264 novas vivendas públicas no barrio coruñés de Xuxán. A actuación saíu a licitación cun investimento de 51,5 millóns de euros, que segundo a Consellería de Vivenda e Planificación de Infraestruturas supón a maior achega destinada a vivenda pública na cidade.
A promoción financiarase con fondos autonómicos e incorpora como condición obrigatoria o uso de técnicas industrializadas na construción. As bases do contrato establecen que só se terán en conta as propostas que acaden unha puntuación mínima neste apartado. Ademais, valorarase o emprego da madeira nos proxectos presentados.
Esta actuación non é a única prevista en Xuxán. A Xunta mantén tamén en fase de licitación a redacción do proxecto e a dirección de obra doutra promoción de 264 vivendas públicas noutra parcela do barrio, un procedemento ao que se presentaron 20 ofertas que están actualmente en avaliación.
A aposta pola vivenda pública en Xuxán chega nun contexto no que o desenvolvemento urbanístico desta zona da cidade xa xerou preocupación veciñal noutros ámbitos próximos. Nos últimos meses, familias afectadas por plans residenciais no contorno de Monte Mero, entre Xuxán e a Cidade das TIC, mobilizáronse contra posibles expropiacións e reclamaron máis garantías e información sobre o futuro das súas vivendas.
En conxunto, o Goberno galego asegura que ten máis de 1.000 vivendas públicas en marcha na Coruña, en distintas fases de tramitación ou execución. Dentro dese volume inclúense as 528 vivendas previstas nestas dúas novas promocións de Xuxán, outras tres actuacións xa en obras no mesmo barrio para levantar 104 fogares, 150 aloxamentos compartidos para menores de 36 anos e 168 vivendas públicas en Elviña, cuxo proxecto foi convocado mediante concurso de ideas.
A planificación autonómica complétase con outras intervencións repartidas pola cidade. Están licitadas as obras de 12 vivendas en Porticada, en redacción os proxectos para 58 vivendas nos Rosais e 30 en Pedro Fernández, en parcelas cedidas polo Concello da Coruña, e tamén se tramitan os proxectos para transformar locais en cinco novas vivendas.