Sada acolle esta fin de semana o Campionato de España Infantil de Patinaxe con cambios no tráfico na contorna deportiva
Sada volverá converterse esta fin de semana nun referente da patinaxe de velocidade coa celebración do Campionato de España Infantil e da Copa de España Alevín. As probas disputaranse os días 27 e 28 de xuño na pista municipal e reunirán a deportistas chegados de diferentes puntos de España.
A competición está organizada baixo o amparo da Real Federación Española de Patinaxe e do club Sada Patín, coa colaboración do Concello de Sada, e permitirá que algunhas das mellores promesas desta disciplina compitan no municipio durante toda a fin de semana.
Con motivo do evento, o Concello informou de que se producirán importantes afeccións ao tráfico na contorna da zona deportiva. Entre os días 26, 27 e 28 de xuño estará prohibido estacionar nas áreas sinalizadas e permanecerá pechado ao tráfico o acceso á pista municipal e ao pavillón pola zona marcada no plano difundido polo Concello.
Como alternativa, o vial situado xunto ao complexo deportivo funcionará temporalmente en dobre sentido de circulación para facilitar o acceso á zona. Ademais, habilitarase un espazo de estacionamento detrás deste vial para dar servizo ás persoas usuarias durante a celebración do campionato.
Desde o Concello pediron comprensión á veciñanza polas molestias que poidan ocasionar estas medidas e agradeceron a colaboración cidadá para garantir o correcto desenvolvemento dunha cita deportiva que situará novamente a Sada no panorama estatal da patinaxe de velocidade.